肥媽和陸浩明（6號）在主持的無綫節目《食平DD》中經常鬥嘴，其實二人已成為忘年之交，肥媽自爆妒忌6號食極唔肥，而6號更膽敢直呼肥媽的名字Maria，即被鬧冇大冇細，非常搞笑！

精打細算的肥媽負責扑錘買食材，6號齋睇吹吓水。

肥媽和6號逛街市時吸引不少師奶Fans索合照。

6號跟得肥媽買餸多，學到唔少嘢！

由肥媽和陸浩明（6號）拍檔主持的節目《食平DD》大受歡迎，今輯肥媽教了不少新潮菜式，原來要歸功6號，肥媽亦滿意6號的表現，讚他幫到手：「煮嘢就幫唔到o架啦，佢嘅責任係搗亂，但係就畀咗好多意見我，好似依家啲後生興啲咩咁，我都希望等啲師奶新潮啲！」不過肥媽自爆妒忌6號：「佢食極唔肥，一日食至少十幾道餸都唔會肥，你話係咪嬲！」

嫌街外餸難食

肥媽絕對可算是煮食成癡，試過一日錄九集都不覺得攰，她說：「我一唱歌同煮嘢食就停唔到！」她試過和老公行街市時，遇到粉絲請教烹飪，肥媽因講唔停而令老公不耐煩：「佢掹我衫袖問我講完未！」

6號笑言自己雖主持了兩輯《食平DD》系列，但其烹飪技術毫無進步，卻練出一條挑剔的舌頭，他說：「出去食一樣嘅嘢，會覺得肥媽煮得好食啲！」記者笑言若女友親自下廚，他會否仍敢挑剔，聽罷他即面有難色，更遭肥媽揶揄：「佢見到女朋友個樣，就咩都覺得好食！」6號還覺得自己多了一個前輩級的好朋友，更膽敢直呼肥媽的名字Maria，即被肥媽鬧他冇大冇細，非常搞笑。今輯節目大獲成功，6號期望能三度添食，衝出香港製作《食平3D》。