模冬甩成員陳芷敏（Elke）近年密密返內地搵真銀，但原來「人仔」唔易賺，她表示曾被狂敲車門要求拎錢，又險被扯落台！她更提醒兩位師妹鄭安那（Biona）及潘欣妮（Loretta）要注意人身安全！

對於北上做騷，Biona（左起）、Elke及Loretta都大叫「怕怕」。

自從蔡少芬早前到內地演出時被「賣豬仔」後，令不少有意北上「掘金」的藝人人心惶惶，而入行三年多、算是半個師姐的Elke趁着空檔，約了師妹Biona和Loretta大談「搵人仔」經歷，並提醒她們事事小心：「其實最初返內地都幾危險o架！因為有次上去一間酒吧停車，突然間有人狂敲我哋車門，睇睇吓原來想示意我哋畀錢佢，個心真係嚇到離一離，唔知點算好！好彩最後車上嘅同事提我千祈唔好開車門，之後佢就同嗰個人講：『我哋冇錢o架！』然後即刻開車走人！又試過啲粉絲太熱情，捉實我隻手唔放，差啲扯我落台，搞到我瘀晒，等咗成個星期先散瘀！」

而有數次內地登台經驗的Biona亦大嘆危機避無可避：「其實去親表演，啲人都會好熱情，如果佢哋撲埋嚟真係避都避唔倒，惟有靠保安手拖手築人牆，咁就會放心好多！」至於未試過返內地工作的Loretta亦表示有所得着：「下個月第一次上去做騷，雖然驚驚哋，但始終都試吓，自己會小心！」