子丹「搶」人辣慶菲比斯

「宇宙最強」甄子丹也有失威時，他與太太汪詩詩亮相海南高爾夫球活動，並即席試打高球，但球技麻麻，連汪詩詩也比他在行！結果要正在指導「新水怪」菲比斯打波的教練過來替他指點迷津，搞到「新水怪」一度黑面。

甄子丹與太太汪詩詩昨日亮相《觀瀾湖世界明星賽》宣傳活動，並在大會安排下到球場試打高球。由於傳媒人數眾多，現場又有不少子丹粉絲吶喊，將寧靜的球場變得非常嘈吵，加上正在指點「新水怪」菲比斯（Michael Phelps）打球的教練要過來教子丹打波，令本來專心練波的菲比斯無法集中精神，最後面燶燶行開。

活士教練親指導

子丹在曾教高球好手老虎活士（Tiger Woods）打波的教練指導下試打，這位高球初哥由頭學起，用了十分鐘時間去掌握，但擊出的球路依然是偏離目標，其後才逐漸上手。

隨後，換上太太詩詩落場，球技明顯較老公叻，難怪「宇宙最強」的他也要自認「高球最渣」，子丹說：「我同太太喺室內場打過兩、三次高球，太太叻啲，我球技OK，只係想打到個波飛起。（打功夫易啲？）打功夫辛苦好多，打高球唔會受傷。我想練好啲準備下屆參賽，同圈中人鬥波。（同黎明鬥？）好呀！但佢一定叻過我，我打高球最渣。不過，打高球可以早起身、當遊戲同傾生意，仲可以帶埋仔女同行，我家族入面好多人都識打，我唔想被孤立，所以好想學得識。」

子丹被問到疑似激嬲菲比斯，他說：「唔覺喎！頭先可能語言不通，我感覺佢好有禮貌，係世界級運動員，我好鍾意佢。（佢畀你搶晒鏡？）唔係！可能現場多中國人啫！」子丹與詩詩其後在公關安排下，與菲比斯大方握手供傳媒影相，彼此笑容十足，並無芥蒂。