抱女買玩具邱淑貞半踎拍車

邱淑貞日前與老公沈嘉偉帶幼女沈星買玩具，雖然囡囡鍾情粉紅色的女孩子玩具，但一直諗住追個仔的豆斗，卻對老公至愛的林寶堅尼電動跑車感興趣，更半踎以手機拍照。

昔日性感女神邱淑貞（豆斗），自1999年下嫁沈嘉偉後，隨即退出幕前做幸福少奶奶，並先後於2001年及2004年誕下兩名女兒沈月和沈日，一直被指想為老公追個仔的她，於2010年8月以42歲高齡再誕下幼女沈星，而沈星跟大家姐沈月同樣遺傳了媽咪的美貌。

隨着沈月和沈日日漸成長，豆斗已不用過分費心照顧她倆，近年主要照顧快將兩歲的沈星。上周五約晚上7時，豆斗兩公婆帶沈星到沙田行街買玩具，同行還有一名女友人。被爸爸抱住的沈星，不時眼仔睩睩四圍望，相當可愛。一家三口進入一間大型玩具店後，沈嘉偉便將囡囡交給老婆照顧，雖然不少顧客認出豆斗，但他們未有理會，繼續睇玩具。

睇中林寶堅尼

豆斗過往曾參與慈善賽車，加上老公又喜歡跑車，家中擁有多部名車，包括林寶堅尼、法拉利、平治跑車、GTR等辣跑，未知她是否想囡囡成為車手，故進入玩具店後，她第一時間便選購電動跑車，期間更半踎以電話拍照，豆斗看見一輛沈嘉偉至愛、價值899港元的林寶堅尼電動跑車，即叫埋老公一齊睇。

其後，豆斗抱着囡囡揀玩具，沈星對粉紅色的玩具情有獨鍾，尤其對Hello Kitty玩具愛不釋手，又不時伸手摸，豆斗向店員詢問幾句後，店員為她拿取貨架上的玩具到櫃枱，豆斗向囡囡輕聲地說：「媽咪去畀錢喇！」其後將囡囡交給女友人抱，自己則排隊付款，而尾隨的沈星視線全程望着新玩具，相當趣致。