Phoebe嚇窒17歲車手

胸模許穎昨日獲邀到澳門賽車場，甫見17歲的西班牙車手賽恩斯即肉緊送抱兼送吻，更公開大讚他有才華，難掩一臉冧樣！

許穎（Phoebe）昨日身穿低胸短裙，力谷34D上圍，由於車房侷促，不時喊熱，連「事業線」都冒汗！眼見賽恩斯講解時驚青口窒，Phoebe竟愈黐埋身，不僅大送秋波，還突擊玩咀面珠，認真主動！

向來勁Like刺激事物的Phoebe，自爆首度現場睇方程式賽車，甫到澳門聽到「轟轟聲」已經很興奮，不過她似乎對賽恩斯更有好感：「我鍾意有才華嘅男仔！一直以為車手都好Man，估唔到呢個男仔咁斯文，佢有好長嘅眼睫毛，對眼好靚好似識發光咁！」未知是否怕被拒絕，她又補多句：「佢只得17歲，我無意發展囉！」

啤酒倒心口

另一邊廂，Phoebe前晚着比堅尼在酒吧出席活動，與王麗嘉（Rika）、徐熙素（Hazel）及紫倫（Chilon）鬥性感。Phoebe有意無意倒瀉啤酒在心口，全場哄動！問到會否怕走光？她說：「我喺屋企試咗好多次，會Send相畀同事睇，所以佢哋收到我啲好少布嘅相！」