歌神《張學友1/2世紀演唱會》前晚於紅館閉幕，張智霖拖老婆袁詠儀捧場，學友勁歌熱舞令觀眾拍爛手掌，還多唱一首《真情流露》答謝尾場觀眾。不過，原來開場時發生了壞耳機事件，令後台陣腳大亂！學友說：「耳機開頭有啲怪怪哋，完全聽唔到嘢，一個聾咗嘅人點唱歌！」
完騷後，學友接受訪問自爆開場前發現耳機故障：「完全聽唔到自己把聲，好驚！隊Band拖到冇可能再拖，惟有照唱，激死我！（你冇甩嘴？）可能啲歌熟啦！」歌神心情High爆，慶功宴上還表演軟骨功：「我識摺埋！」即時表演彎曲上身，將頭貼着雙腳！
有信心破紀錄
製作人陳淑芬表示學友已接逾百場巡唱，學友希望尾站返港演出：「因為要配合原本個舞台，可能要改喺亞洲國際博覽館舉行！」據知，每場歌酬高達百萬元的他，逾百場可帶來逾億元收入，問到是否填補當年雷曼的損失？他笑說：「冇計、冇諗、冇理，唔係等錢使！（有信心打破105場紀錄？）有信心，不過唔係想破紀錄！」
學友全晚載歌載舞，令觀眾盡興而歸。
張智霖與袁詠儀拍拖撐學友，認真夠Friend。
學友表演「摺埋」，勁呀！
學友的巡唱香港站大功告成，令他大感滿足。