「糕」招氹母　劉心悠亂嚟

台灣藝人劉心悠日前特地炮製復活節甜品，自言廚藝了得的她竟差點反轉餐廳，製作時猶如回到童年，把糖漿唧到四圍都係，最後更死撐甜品賣相靚過師傅作品。

劉心悠雖然忙於綵排舞台劇《直子小姐》，但她日前抽空到餐廳炮製愛心禮物，希望給由台灣來港欣賞其舞台劇演出的母親一個驚喜，自言廚藝甚有天分的她，希望炮製一個特別的朱古力蛋糕，但過程卻雞手鴨腳，幾乎反轉枱上的材料，還把糖漿弄到一手都係，結果她傻笑地把手上的糖漿吃掉。

為家人露兩手

及後心悠充滿童真地在碟上用糖漿「簽名」，她自誇充滿藝術細胞，要放在餐廳留念，並說︰「我覺得自己整得靚過甜品師傅，我好鍾意整甜品，覺得好好玩，好似返咗去童年，得閒都會幻想做廚師。」

此外，她表示會為屋企人露兩手，但不會弄給心儀對象品嘗，她說︰「我冇試過整畀男仔食喎！會同屋企人分享，尤其係媽咪，知道佢會專程喺台灣嚟睇我嘅演出，所以會整畀佢試吓。」問到最難忘的復活節？她說︰「我喺加拿大讀書嗰陣，放假會去鞋舖工作，因為假期關係好多人嚟Shopping買嘢，雖然辛苦但賣到好多對鞋，賺到唔少錢o架！」