子怡中性Look o太有型

春回大地，是時候收起大褸，下一步開始入貨，買定春夏流行的薄外套，今季繼續流行皮褸、西裝外套，名模周汶錡及Jessica C.親身示範皮褸的不同着法，高貴或狂野任君選擇；而章子怡的一流配搭，堪稱絕配！

高分組

章子怡襯得最靚 9分

「好靚，件褸針織、全白，好啱呢個天氣，好高貴，我好欣賞佢條呔，成套Outfit襯埋好Fit，頭髮亦Set得好好，襯得好靚！」

Jessica C.狂野晒腿 7分

「好型，Model身材着乜都好睇，JC咁樣着皮褸騷長腿，有陣陣Rock味，依家涼涼哋着長Boot都OK，熱啲就可以襯厚底皮鞋或者鬆糕鞋。」

周汶錡簡單突出 8分

「簡單有型格，轉季啱着皮褸，其實皮褸年年都興，Kathy呢件有Shoulder Pad加咗少少唔同嘅元素，黑色之餘有Cutting，令件褸簡單得嚟好突出！」

江若琳善變少女 7分

「又係皮褸襯碎花裙嘅示範，佢件皮褸襯出嚟好有少女味，舒服簡約，春季會好興咁着，加件褸即刻多咗種型格，唔會好似齋着碎花裙咁單調！」

穩陣派

裴殷青春花女 6分

「A. Lin條裙好切合春天興碎花裙仔，深色裙襯淺色褸，咁嘅襯法一定冇問題，相比起黃婉曼嘅着法，A. Lin感覺就青春啲，黃婉曼嘅着法就斯文啲！」

黃婉曼封咪主播 6分

「呢個OL Look襯番佢個主播身份，條花裙同件褸撞色撞得幾好，件短身、淺色褸襯條深色碎花裙效果幾特別，收起性感反而有另一番成熟味。」

糖妹典型瀛女 6分

「好典型嘅日本o靚妹Look，牛仔恤衫襯國旗裙好有Layering型格，又Sharp又青春，牛仔恤衫當褸着又會有另一種襯法，今季都有呢類Item。」

官恩娜黑白搶眼6分

「西裝褸每年都興，黑色一定最安全，Ella（官恩娜）件白色西裝褸好搶眼，着完之後感覺較中性，今年都會繼續流行西裝褸，不過就會興啲螢光色，好似鮮紅、鮮橙咁！」

失手派

薛凱琪古怪牛女 4分

「個造型怪怪哋，件恤衫咁樣當褸着又唔係好型，呢個Look似以前個年代，好似牛仔Look，加頂牛仔帽仲好，依家頭髮又冇整，副眼鏡又怪，成個Look好唔襯。」

Celia Profile

本地時裝設計師及星級形象指導Celia Wong（黃欐堯），曾任陳慧琳的形象顧問，並創立時裝品牌Da Da Girl，曾與多位本地歌手合作，包括江若琳及孫耀威等。