陳嘉桓磨拳踢腿打入宅男心

時移世易，16歲入行可以靠青春活力，晒事業線晒美腿行性感上位，成為宅男女神！不過陳嘉桓卻揀了一條較辛苦的路，拒絕以性感作賣點，認為要用自己的拳腳及真功夫，努力博取大眾認同！

陳嘉桓（Rose）16歲已入行做模特兒，兩年前的一次機會，令性格文靜的她第一次接觸功夫，及後更有機會演出電影，並以打女形象示人！Rose坦言當初學功夫只當是上興趣班︰「兩年前老闆冼國林問我有冇興趣學功夫，佢係習武之人，起初只係當興趣班練吓，不過學咗覺得幾好！」到後來有機會為電影《葉問前傳》試鏡，最後更被睇中飾演葉問的小師妹，對於當時只得17歲的她來說，的確有點受寵若驚︰「真係冇諗過咁快有機會拍戲，仲要第一部就係動作片，機會真係好難得，覺得自己好幸運！」

幸運並非必然，最重要是懂得珍惜眼前的機會，初登大銀幕的Rose深明這一點，所以事前不斷努力付出，她說︰「同我差唔多年紀嘅女仔，都係去行街Shopping扮靚，同朋友嘻嘻哈哈！講真，有邊個女仔會走去學功夫？仲要由朝學到晚！可以話將所有時間放喺功夫度！」大部分父母都覺得女仔不應打打殺殺，不過Rose的父母剛剛相反，反而支持她去學功夫︰「未入行之前我好靜，放學唔會做運動，只會畫吓畫，屋企人見我平時都唔做運動，咪叫我去學吓，學多樣興趣都好，佢哋話︰『仲細咪去試吓囉！你又唔會打到斷手斷腳返嚟嘅！』」得到家人的支持，令Rose更有動力博一鋪！

周身骨痛 閨房偷泣

Rose捨棄普通女孩子的生活去打功夫，起初確實有點不習慣，加上比其他人遲起步，平日又較少做運動，難怪有點力不從心︰「拍《葉問前傳》前個半月已經同武術導師去橫店練功夫，不過我諗點解未拍要上去咁耐？進度又唔理想，不過呢個係一個考驗，我冇放棄，要畀人知我係有心學！」憑一份堅持，抱「做到最好」的態度，Rose的功夫開始得到武術師傅的認同，開拍前打了一支強心針，不過她坦言當初有點後悔做打女︰「我諗都唔使諗就會答你：『有後悔過！』學功夫頭半年係試用期，係我一個過渡期！學咁耐冇乜起色，真係好唔開心，會唔會真係唔適合呢？試過返屋企喺房喊，點解自己要咁辛苦？練完功夫，手、腳同頸都好痛，返學行路要同學扶，自己本身好鍾意畫畫，但隻手痛到畫唔到！」

父母支持 信心大增

首次拍電影就擔正，在娛樂圈中不是個個有機會，Rose始終是電影新丁，承受不少壓力，幸艱難時期她得到父母的鼓勵及支持，親情給她原動力克服當前難關，她說︰「屋企人知我返到屋企喊，佢哋會鼓勵同幫我分析，好記得佢哋同我講：『你呢個年齡好多都係模，係咪要做一樣嘢可以突出自己？等人知道你唔同？』」父母的說話令Rose重新振作，她認為要做打女就要做到最好！