張曼玉返港唔約偉仔
張曼玉（Maggie）專程返港，昨晚出席汽車品牌活動，一身型女打扮的她甫到場即成為傳媒焦點。Maggie心情大靚，停步五分鐘接受訪問，她透露今次會留港一星期：「跟住會先去北京同歐洲，半公半私囉！（陪男友Ole Scheeren？）我差唔多每次去北京都係見佢，總之我哋仲拍緊拖，冇變過！（冇計劃結婚？）冇呀！我唔需要，而且唔相信婚姻帶嚟嘅安全感。」
聖誕多數陪男友
已離婚的Maggie，不認為對婚姻失去信心，只是因為早前留下的陰影：「唔覺得自己做錯過，再嚟多次我哋都會係咁，依家最緊要係兩個人生活開心，相處舒服。（香港政府立咗婚姻法，離婚要對分身家。）其實好多國家都有咁嘅法例，但如果合唔到，兩個人唔應該結婚，婚前講定離婚點樣，我覺得咁好肉酸囉！」
Maggie坦承今次返港會找老友敍舊，但當提到梁朝偉時，她竟笑說：「唔會特別約嘞！你哋（指記者）喺度，點約呀？（聖誕點過？）未定呀！多數會同佢（指男友）一齊。」此外，偉仔老婆劉嘉玲昨晚在微博祝賀老友張叔平生日，二人還上載兩張抱抱及親面珠照。
張曼玉返港出席活動，心情大靚。
