世界波：識得食不舉男有救

肥男等於性無能？冇講笑，事關美國紐約威爾康奈爾大學最新研究發現，腰圍超過40吋男士，有高達3/4機會出現勃起功能障礙。好在專家亦提出補救方法，只要減去2吋半腰圍，已能改善問題。不過減肥都係其次，壯陽其實先係關鍵，今期細佬就推介幾款健康壯陽食物畀大家，包保你哋食得健康，又可保住男人雄風。

呢個研究喺最近一期《英國國際泌尿學期刊》刊出，據講佢哋訪問咗超過400名男士，年齡介乎40至91歲，調查結果發現腰圍愈粗，不舉問題愈嚴重。其中腰圍細過36吋嘅人，有1/3機會患上勃起功能障礙；腰圍介乎36吋至40吋嘅男士，不舉機率則達5成，而超過40吋，就更有3/4人抬唔起「頭」，真係好誇張喎！

肥胖已經唔健康，家陣仲要承受埋男人最痛，所以各位中央肥胖嘅男性都係要盡快減肥！不過細佬就覺得減肥都未夠，中國人着重固本培元，減肥之餘順便壯陽先至係王道。

牛奶+咖啡 催情激素

人人都知飲奶好，補充鈣質之餘仲可以護膚，所以美國註冊營養師Kaayla T.Daniel就建議男士每朝飲一杯全脂奶或食用非人造牛油，以吸收足夠一日所需嘅脂肪，此舉可有助男性產生性激素；此外，咖啡因亦有助提高性慾及平衡心情，飲完咖啡砌起上嚟都持久啲喎！

食蘆筍 龍精虎猛

蘆筍經常被用作西餐配菜，喺長期研究健康性食品作者Genie James嘅著作《In The Mood Again》中，則用咗整整一章嚟推薦蘆筍，只因佢有助平衡賀爾蒙，男女啱食，而長期食用，更可令性生活火辣辣，若然配埋烤牛肉一齊食就更完美。皆因牛肉含有豐富嘅鋅，有助釋放性慾，兼且每100克大約只有10毫克脂肪，冇咁易肥！

紅酒配朱古力 賽前佳品

食完頭盤牛扒配蘆筍，記得要配埋杯紅酒同朱古力做甜品至夠堅！皆因University of Florence搵咗800名18至50歲嘅女性做研究，發現每日飲用兩杯紅酒嘅女性，性慾高漲度比冇飲用的活躍，床上表現亦較未飲用前較少抑制，出現高潮嘅機會都多啲。至於朱古力可催情就係人都知，但原來仲可以產生血清素，令食用者自我感覺良好，男女埋身肉搏時都會更敏感喎！

雞蛋、魚子醬 輪住食

雞蛋含有超多嘅維他命B5及B6，有助男女平衡賀爾蒙水平，每日食用當然最弗！而專家就建議食烚蛋比較健康，若嫌太單調，可配搭魚子醬食用，功效會更佳，但價錢當然比較貴啦！

一日一香蕉 硬到噹噹聲

香蕉係最具代表「性」嘅食物，事關香蕉含有豐富嘅鉀、鎂、維他命B，及酵素成分，容易提高男性性慾，只要一日食一隻香蕉，包你硬到噹噹聲！唔鍾意食蕉，不妨改食甜番薯，內含勁多胡蘿蔔素，可轉化成維他命A，令男士產生性激素之餘，女士食用更可以令陰道及子宮更健康。