港隊小粉絲的眼淚牽動全城，誰說香港只有勝利球迷？時光回到2009年的東亞運傳奇一刻，同樣全城吶喊，無奈金牌光環漸退以後，陣中成員逐一離場。當日在決賽正選登場的曾錦濤，今季轉投東方證明實力，縱然只能在較次要的「香港B隊」賽事候命，熊火潛藏心底猶未熄：「好想畀人睇到我哋呢代『80末』係得嘅！」

「睇番都有啲眼濕濕，記得當時上晒報紙頭版，前路充滿希望，點估到熱潮話散就散。」訪問正值港隊作客卡塔爾翌日，港腳尚未歸隊的東方操練略顯冷清，曾錦濤正隨同樣曾是東亞運金牌功臣的黃展鴻，苦練邊路出波。說起球迷為港隊世盃外製作的打氣MV插入東亞運片段，不無感觸。「畀人叫做年輕球員好多年，係時間要出去闖！有邊個足球員唔想踢正選？依家喺東方起碼有得出場，我相信我嘅決定冇錯！」

感激傑志昔日栽培

最美時光留在後備席虛耗，阿濤難掩失落，但仍對傑志心存感恩：「甘巴爾初來埗到叫我哋填表介紹，我寫自己前鋒、邊線同中堅都踢得，佢最初唔信，但練波時睇到大家能力，放膽畀我哋嘗試，就算有失誤都要求我哋繼續用地波組織，令我用波能力改善唔少。畢竟同我同位置嘅係盧均宜，爭輸位置亦心甘命抵，惟有自己練好啲唔好Hea，否則我諗自己已經轉咗行！」

少年時代已與歐陽耀冲在港青並肩作戰，一路走來的1988、89年出生的「80末」戰友，逐一淡出球場，就像前太陽飛馬後衞蘇偉泉便轉戰娛樂圈。「睇住一個又一個戰友離開，難免會寂寞，好想為我哋呢代爭番口氣。」阿濤在家中四兄弟排行第二，大哥亮相港甲一季便投考教練牌，現於太陽國際體育會培育幼苗。阿濤自言從前青訓不及現在選擇眾多，適逢「80末」一代遇上足總削減青訓資源，唯一一次出外比賽，只有到新加坡出戰獅城盃。「當時大家好珍惜，放學未食飯就跑山谷體能。或者係我哋呢代Timing麻麻，華家堡散班後冇乜球會選擇，唔少隊友想踢都冇得踢。相比下，比我哋後生一批幸福好多。」

多得家人女友撐住

縱然不甘，阿濤從沒在社交網站嗟天怨地，即使只在較少關注的港澳埠際賽才獲港隊徵召，仍甘之如飴：「起碼叫做仲記得我！就算踢唔到一隊正選，起碼都要做到第4、5個替補！」阿濤笑言母親曾將他的東亞運金牌展示給親朋戚友，回想小時候遭質疑踢波沒前途，家人與女友的支持，成為走下去的最強動力：「聽過好多打擊說話，但我始終相信唔放棄就可以達到目標。下一步最希望為東方贏得聯賽冠軍，出戰下年亞冠盃，見識一下更高水平足球！」

圖/文：徐嘉嘉