踢波只是一時，做人卻是一世。元朗主帥馮凱文當職業足球員短短兩季便抽身而退，年紀輕輕轉執教鞭卻另闢出路，連番帶領小將稱霸學界，校隊球會兩邊走，他依然堅持紀律至上宗旨：「踢波同做人一樣，最緊要有Heart！」

教練從來不易做，季初遭逢15場不勝的馮凱文，自然清楚不過：「做得呢個位就要承受批評，呢個係遊戲規則，接受唔到就唔好玩。球圈前輩教落，最緊要問心無愧。」帶領南區升班首季便膺最佳教練，當時的他只有36歲，「領軍」經驗卻已長達15年。自知沒有過人天分，馮Sir馳騁港甲兩年便引退，轉個彎，前路更廣闊。

同學講粗口 罰做掌上壓

馮凱文回想道：「我19歲就考教練牌，當時走得比人早，算係幾馨香。」執起教鞭首個任務，便是率領母校賽馬會體藝中學征戰學界精英賽，麾下大將包括自詡「天才」的李志豪，難怪馮Sir稱以當時陣容「唔使點教都贏」。此後轉教傳統名校拔萃男書院，16年來屢創佳績，獎盃的意義，比不上身教重要。「心態決定一切，細個唔教好，大個好難教。試過有學生比較反叛自我，經我教導後反省改過，依家畢咗業，依然不時會問我意見。」每逢男拔捧盃，學生總會擺出招牌「大頭」手勢答謝花名「大頭文」的馮Sir，打成一片，卻不失嚴師本色。「我帶校隊特別嚴，畢竟係代表學校，如果有同學講粗口，就要罰做掌上壓。」

為了見證兩名幼子成長，去季帶領南區取得升班資格後，馮Sir一度考慮謝絕球會職務，卻被元朗主席王威信打動。「王生當時只係講咗一句『你係專業，你嘅意見我都會聽』。結果佢冇食言，試過第一場聯賽同佢報排陣同戰術，佢話全交由我決定，即使15場不勝，都冇畀壓力我，但成績欠佳，我都過唔到自己嗰關。」

「牛丸」+李志豪 高徒一大籮

面對教波以來最難過的難關，馮Sir曾在操練化身聖誕老人送禮搞氣氛，又不時細心聽取球員意見，放下帶校隊時的嚴肅一面，唯獨紀律仍大同小異。元朗主力如葉頌朗、曾昭達、邱于銘等，早在中、小學已與馮Sir結下師徒緣，陳卓光更被馮Sir鍛煉出手榴彈絕技。說到「高徒」，不得不提有望創造女帥捧盃歷史的「牛丸」陳婉婷。「『牛丸』當南區助教時，比我有較多甲組隊經驗，我不時反過來聽她意見。教練、助教同球員，應該互相欣賞尊重，不應分高低。」這份亦師亦友的成功感，馮Sir直言是教波以來最大得着，以為身兼男拔中、小學校隊及元朗主帥三職為搵「奶粉錢」？那便大錯特錯：「要發達就唔應該去教波。無論幾忙我都冇諗過放棄教校隊，因為我想畀學生知道，學做人緊要過學踢波。」比賽輸贏只有90分鐘，永不放棄的態度，卻能應用一輩子。