「情聖」尼馬又出手！呢位巴塞隆拿球星公認為「筍盤」，萬千少女都畀佢迷倒，被譽為哥倫比亞20大性感女神嘅名模Liliana，尋日上電視自爆同尼馬「網戀」，甚至表示計劃飛去西班牙同尼馬作進一步發展！

Liliana喺哥倫比亞節目《The Red》透露：「尼馬喺Instagram主動傳訊息畀我，我都好奇怪點解佢識我，尼馬話喺西班牙睇到雜誌介紹我喎，我哋真係傾得好開心。」

小休順便去紋身

樣靚身材正嘅Liliana表示兩人依家只係「網友」，但佢就心郁郁想發展：「我唔排除會去巴塞隆拿搵佢，尼馬好靚仔、好吸引，呢一點無可否認。」據報Liliana同尼馬已經「網交」咗半年，都係時候將感情升呢啦！

目前身處巴西小休嘅尼馬，喺社交網公開右腳小腿嘅新紋身，佢特別搵嚟巴西紋身大師Adao操刀，紋上「QUE DEUS Abencoe me」（上帝保佑我）。