湖人今季最後一次對馬刺，亦是季尾退休的高比拜仁，生涯最後一次與馬刺及老將鄧肯碰頭。高比今戰上陣29分鐘，攻入25分並貢獻4個籃板及3次助攻，第4節更勇戰到手指脫臼，惟讓隊醫接回原位後，又上場搏殺。「紫金軍團」結果僅以113:119惜敗馬刺，但高比表現仍獲鄧肯激讚。

高比右手中指打到甩臼。（美聯社圖片）

高比與鄧肯自1997年12月5日首次碰頭後，就一直各為其主鬥足19個球季，昨日為兩人最後一次於NBA賽場互撼，成為今仗焦點。兩人表現亦未有令球迷失望，高比轟入全隊最高25分，而鄧肯就貢獻12分、13個籃板的「雙雙」成績。高比於第4節最後兩分鐘一次攻勢受傷，右手中指脫臼。雖然受傷，但高比叫隊醫即時將手指接回原位，又若無其事返回場上作戰，贏得全場觀眾掌聲。

贏全場掌聲 湖人惜敗

可惜高比再奮勇作戰，仍無法以勝利為對馬刺的長期戰鬥畫上完美句號，「紫金軍團」最終以6分之差不敵馬刺。儘管輸波，但高比表現仍獲鄧肯大讚：「高比一直都係鬥心超強嘅球員，今場佢Show晒出嚟。最後一節更打到手指甩臼，但佢依然仲返回場上比賽，證明佢心入面團火仲未熄。」