將軍澳運動場昨夜寒風刺骨，但場內上演的港超聯補賽則「慶合合」，這場由南華合場大戰元朗的聯賽最終由主隊以2:1全取3分，過程卻驚險萬分，客軍在兩名新援雲迪奴域及史提芬彭利拿合作攻堅下，下半場一度圍攻「少林寺」，險些追平比數，南華射手賴恩格菲斯一記疑似報復行為更令場內氣氛急速升溫，兩軍周六在港超聯再戰，必定有好戲睇！

南華翼鋒艾華（中）被法比奧（右）攔截，成個飛起。

南華昨仗上半場踢得頗為輕鬆，7分鐘就打開紀錄，張健峰左路殺落近底線使出招牌傳中，客軍守將及門將皆未能清走皮球，造就後上的卡路士近門射入成1:0；26分鐘，梁子成禁區左側一記似傳非傳的射門直笠龍門遠柱死角，將比數拉開至兩球。

賴恩格菲斯辣火頭

換邊後，落後的元朗調入雲迪奴域救亡，隨即反客為主搶得主導權，造出大量具威脅攻勢，可惜雲迪奴域一射一頂，及葉子俊半單刀都無法命中目標；南華下半場落下風之餘，射手賴恩格菲斯更一度化身「惹火尤物」，這位澳洲援將與葉頌朗發生碰撞後跌倒，球證未有示意，他其後出腳踢跌這位元朗中場疑似報復，引起兩軍球員多次爭執，終被調離場。完場前兩分鐘，摩拉禁區內撲跌雲迪奴域，球證直指十二碼，史提芬彭利拿射入追回一球，但南華力戰下終保住2:1勝局，全取3分。

馮凱文：下場主動出擊

「少林寺」贏得驚險，隊長陳偉豪賽後亦直言：「簡直係艱苦，被壓住打，唔知點解要踢得咁辛苦，應該可以放膽啲，可能贏緊兩球驚輸啦！下半場元朗表現的確比我們好，踢得夠放，但最重要是取得3分。」他又指，謝家強受傷及卡路士半場嘔吐不適被調出，影響了部署，但對周六再戰元朗有信心：「到時陣容會更完整，不太擔心。」元朗主帥馮凱文表示本來想先做好防守，故先收起雲迪奴域，卻因上半場太差而先失兩球，實在始料不及，他表示下仗再鬥南華，返回主場後必會踢得更主動，雲迪奴域亦大有機會擔正。

圖/文:高詩琦