能戴起隊長臂章，當然要有隊長風範，今屆省港盃年僅19歲的陳俊樂出任港隊隊長成為一時佳話，但不要忘記港隊與南華還有一位熱血隊長陳偉豪！隊長不一定最好波，最重要是隊友受落，早前南華在幾場大戰失利，危急關頭更需要「偉豪」這位好領袖，帶領隊友迎接新挑戰。

陳偉豪的領導才能在讀書時代已顯露出來，他回憶道：「我讀書成績差，課室入面根本冇人聽我講，反而出到球場，因為我比較識同人溝通，又鍾意搞gag講廢話，所以有機會做校隊隊長，入選香港青年軍之後，亦試過同李志豪輪流做隊長。」

至Like張偉康高尼路

中學時期，陳偉豪在體院受訓，當年遇上足球生涯第一個好隊長，就是已退役的「肥康」張偉康：「體院階級觀念重，教練亦好嚴厲，比我年長嘅隊長『肥康』好維護後輩，畀教練鬧完，佢會呵番我哋。」成為全職球員後，「偉豪」遇上另一位影響他至深的隊長，就是當年入籍香港的巴西中堅高尼路。高尼路以隊長身份率領港隊出戰亞洲盃，他的熱血精神令「偉豪」深受感動：「當年港隊喺國際賽成績唔突出，記得有場對卡塔爾，我哋落後3球，全場只有佢繼續鼓勵隊友，要一支輸到『頭耷耷』嘅球隊再抬起頭係好困難嘅，高尼路當時嘅表現令我印象好深刻。」

經過10多年無數次磨練與考驗，陳偉豪4年前成為港隊與南華「雙料隊長」，亦掌握了做好隊長的竅門：「做隊長唔一定係最好波，亦唔會有任何特權，我覺得隊長職責最重要係同隊友保持良好溝通，只有溝通，先可以建立信任，先會有默契，尤其對香港隊嘅入籍外援同國援，我會主動同佢哋熟落。」他笑說：「可能有時太過火，有啲隊友會嫌我煩，黃洋就係其中一個，哈哈！」

正面樂觀最緊要

南華近期在聯賽及銀牌連場大戰敗北，陷入低潮，陳偉豪更自覺責任重大：「球隊任何時候都必須要保持正面樂觀態度，有時輸波亦係好事，因為可以從中找出問題所在，收復失地。」