香港人需要真英雄，葉鴻輝全城爆紅，為香港足球員建立全新「男神package」。精選特餐背後，還有無數A、B、C餐默默打拚，靜待有心人送上掌聲。「唔係要好多人識我，但起碼睇完場波後，希望大家會記得我個名。」作為「英雄輝」身旁的男友人，香港飛馬後衞黃俊皓出道8年低調沉實，年初省港盃才首度入選大港腳，半途發力，仍然有得追。

「13號黃慶燁喺後防踢得幾好，連費蘭度都畀佢爆番轉頭。」香港飛馬早前在聯賽不敵傑志，「13號仔」仍在球會facebook專頁獲球迷稱讚，不過他的正確名字是叫黃俊皓。「都慣晒，飛馬門將叫袁皓俊，我哋經常畀人撈亂。」自幼在青年隊與葉鴻輝老友鬼鬼，「阿皓」卻比同齡隊友遲發力，別人踢甲組，他卻仍隨香港C隊留在預備組。「從小到大，我唔突出，又唔太差。那時大部分隊友都畀甲組球隊選拔，我就要自己敲門試腳。」

半途發力 爭取再入港隊

亮相甲組首兩季，效力的淦源及愉園皆降班收場，「阿皓」逐漸站穩正選，無奈踢法實而不華，光芒難免被掩。「有時同黃威講笑，點解你受傷冇得踢，大家都搵你簽名訪問，但就冇人搵我？」笑聲背後難分真假「葡萄」。與其埋怨，「阿皓」選擇自我鞭策：「飛馬今季要兩閘多上前助攻，自己比前放膽，逼自己進步。」

省港盃替補入圍，他的名字因犯規輸掉12碼被球迷記得，不過老友談樂軒的入球，也是由他在右路策動。「呢場表現唔合格，太緊張。就算要做港隊替補第3人，都要努力去爭取。」迷網中找到方向，皆因沿途有她：「女朋友同父母差不多每場都入場支持，我都好想畀啲成績佢哋睇，等大家記得我叫黃俊皓。」