天才的舉動，往往意想不到。36日前半場暴走更衣室，竟成了李志豪（虎哥）在標準流浪的最後足迹。直來直往的火爆個性，讓他嘗過不少苦頭。「我得罪過好多人，喺度同大家講聲對唔住。」難得正經訴心聲，「虎哥」下周二轉戰梅州五華，揚言會收斂脾氣學做「鵪鶉仔」，誓在中甲綻放餘暉。

港隊後衞 李志豪

以前唔啱聽即反擊

除「虎哥」外，球迷還幫李志豪改了不少花名，如「雙中李」、「442」等，無不與他的出位言行有關。「虎哥」表示：「以前比較內向，遇到唔啱聽嘅說話就會反擊。試過畀Kim Sir（金判坤）話我唔認真，我哋起爭執，之後要由隊友拉開。性格好難改變，我已經比以前成熟咗少少，唯獨處理人際關係方面仍然麻麻。」

如今不再與球迷教練互罵，火爆因子仍隨身螫伏。來不及與香港球迷說再見，在標準流浪最後一戰竟以半場暴走更衣室告終。孰是孰非俱往矣，「虎哥」此刻心懷感恩：「可能係我形象唔好，季前轉會已有唔少負面聲音。多謝標準流浪會長莫耀強同總監李輝立嘅照顧，令我有機會證明自己。」

季前與東方分道揚鑣，貴為港隊老大哥，卻一度無班可落。虎落平陽拒低頭，兩場「中港大戰」的神勇演出，贏得中甲梅州五華聘約。吐氣揚眉了嗎？「虎哥」收起笑容：「我好想再次證明自己可在內地聯賽立足。內地踢波有不少場外因素，我不可以再衝動霸道，偶爾扮下鵪鶉仔都無所謂。」

2013年加盟中超北京國安，3個月未嘗出賽便打道回府，「虎哥」決心翻身：「中超訓練質素及身體對抗強度與香港有差別，最初未能適應，之後努力裝備自己，又因易帥令處境變複雜。這個月邊休息邊做GYM，準備比上次更充足。」

豪言踢多10年

在港打拚了17年，縱有質疑聲音，卻不得不承認，認真時的李志豪，正如金判坤所言，仍是港隊首屈一指的最佳後衞。「虎哥」笑言：「我冇話基藍馬唔識踢波，不過唔叻。豪哥（陳偉豪）當然好波，想當年佢同我一樣都係3,000蚊人工，不過我要返學，佢就要練足，你話邊個好波啲？」難分真與假的率直，也有可愛時。昔日叫罵聲漸變歡呼聲，33歲的「虎哥」揚言還可踢多10年：「以前邊會有人搵我影相簽名？依家多咗球迷支持，自己都會較注意形象。無論係鬧我又好，撐我又好，歡迎大家組團上嚟梅州探我！」