今屆女單決賽由兩位非中國代表對撼，去年在決賽不敵戴資穎的日本球手奧原希望，今年面對頭號種子的西班牙球手馬蓮，雙方激戰1小時24分鐘後，奧原希望在決勝局飲恨，再次跟冠軍擦身而過！

馬蓮苦戰贏波後勁激動。

「奧運最大敵人係自己」

身高只得1米56的奧原希望，雖然身形比馬蓮輸蝕，但依然「搏到盡」，多次「瞓身」救波，拚搏精神令觀眾拍爛手掌！馬蓮首局先贏21:17，奧原希望第2局21:18追平，戰至決勝局，多贏1分就可以奪冠的馬蓮，被奧原希望連取5分，打成20:20平手，愈打愈急躁的馬蓮更被球證出示黃牌警告，全場觀眾則不停以「奸爸爹」為奧原希望打氣！可惜馬蓮在「刁時」連取兩分，最終贏22:20粉碎對方奪冠「希望」！

成為首位贏得這項賽事女單錦標的西班牙球手，馬蓮完場後激動得瞓晒地，更大讚奧原希望尾段發揮很好：「奧原希望第3局給我不小壓力，很高興最後仍能奪冠，當然我希望來年能贏得更多冠軍，也希望歐洲再有新星誕生，為羽毛球壇帶來衝擊！」提到明年的里約奧運，馬蓮揚言最大的對手是自己，自信爆燈！