Fu Dragon黃耀富打不死！

Cap帽、黑超、長鏈，縱然沒有G Dragon報稱的1.77米身高，外號「Fu Dragon」的黃耀富在鎂光燈下同樣專業：「足球同演藝事業好似，只不過藝人喺舞台表演，我哋就喺球場，同樣要娛樂觀眾。」16歲港甲出道便被取笑「矮仔」、「侏儒」，幾多難聽說話也聽過，今日換上Fu Dragon式潮Look造型，偶爾與好友陳偉豪在fb上針鋒相對，有人說他浮誇自大，更多的卻是球迷派Like。

「足球要有Noise先有人留意，我又唔係做衰嘢！如果有人留意，叫你男神又好，笑你矮又好，都唔緊要，做球員如果唔畀人鬧得不如唔好做！好彩我都有班阿叔支持，鼓勵我繼續踢落去！」

同偉豪運裝備 幫過卓卓擦鞋

「富仔」說來鏗鏘有力，能在港超屹立不倒16年，卻絕非「靠把聲」。以前自知身高不足苦練頭槌，就連首席鋼門葉鴻輝都曾被他頂破大門，即使退居後備亦從無怨言。「唔夠好波咪冇得踢，有乜好呻！我到34歲都仲踢得，年輕球員應該反省自己有冇付出足夠努力，係咪跑得快過老鬼！」

出道初年，黃耀富曾為卓卓擦鞋，與陳偉豪從界限街「推車仔」運送裝備到九龍仔練波，因為捱過苦，才更懂珍惜。「富仔」說：「細個做o靚仔邊會有錢？賺錢係為咗生活，但當生活足夠應用便不可忘本，要堅持番自己理念。」

運輸、珠寶Sales……為生活，富仔打過15份工，去季初離開流浪後轉踢澳門業餘聯賽，出場費每場5、6千元，始終難捨足球。「踢波有人留意，點會唔留戀。今季我同元朗簽下半季合約，一方面幫助小將成長，一方面保持狀態出戰5人賽。」即使他朝引退，現已是5人青年隊教練的「富仔」，仍盼將不服輸精神繼續傳下去：「我同『小強』一樣打不死！」