等到頸都長，湖人終於開齋！近年淪為魚腩部隊的湖人，開季頭4戰全數落敗，昨日面對同樣「濕滯」的籃網終於「威番鋪」，憑高比拜仁攻入全隊最高的18分，協助湖人作客以104:98贏波開齋。賽後「小飛俠」更發表「一世湖人」宣言，各位「湖躉」安樂啦！

高比拜仁（2,500萬美元）及籃網後衞祖莊遜（2,490萬美元）是今季NBA年薪最高的兩位球員，然而所屬球隊於新季NBA常規賽的表現都是一鑊粥。獲妻女到場打氣的「小飛俠」，昨仗雖然16投僅5中，不過就射入7個罰球兼有3次助攻，帶領全隊有6名球員得分達雙位數的「紫金兵團」

贏波。

勇士贏波居里又創紀錄

獲籃網主場球迷高呼做「MVP」的高比拜仁，今晚會帶隊造訪紐約人，主隊會長積遜早前表示，「小飛俠」極可能於退役前轉會，高比拜仁昨於賽後親口粉碎傳聞：「講咗好多次，我呢世都會效忠湖人，唔會為其他球隊打波。」

同日，勇士藉史堤芬居里貢獻全場最高的34分，包括喪入8個3分波，主場以119:104擊敗金塊，開季6戰全勝。「咖喱仔」開季至今勁入213分，成為自米高佐敦於1989至90球季以來（214分），首位頭6場常規賽得分最多球員。