NBA聽朝開鑼，4大巨星出招爭響頭炮！勇士明早展開衞冕任務，於主場火併塘鵝，雙方Icon史堤芬居里及安東尼戴維斯齊齊擺屋企人上枱，當中「咖喱仔」繼續與阿媽「豪賭」，以1舊水美元1個失誤逼自己做「謹慎球王」，AD就藉「阿公紋身」激發「小飛俠」潛能，一場「未來籃壇揸Fit人大戰」實好睇過戲！（中央5台及廣東體育周三早上10:30直播）；至於戴歷羅斯及勒邦占士亦會於同日正面交鋒，2人分別出動靚表、消炎藥「保平安」。

（now635台周三早上8:00直播）

衞冕的勇士會於開鑼戰披起冠軍版球衣，並會在賽前進行冠軍指環頒獎儀式，縱然這支西岸新貴乃去季NBA總冠軍，但不少球評家都認為騎士及馬刺才是今季的總冠軍熱門。帶領球隊時隔40年再登NBA高峰的居里，深知衞冕任務艱巨，故今夏特別聘任私人教練Brandon Payne，實行一日兩操催谷狀態。

居里自發加操 AD紋公公上身

「咖喱仔」自爆由上月開始，除早上練波之外，晚上9點半後都會重返訓練場加操，這位去季常規賽MVP得主稱：「我唔會喺勇士個Whatsapp群組發短訊，話自己去緊練波，與其逼隊友一齊練，倒不如自己做好榜樣，去感染班兄弟加倍努力。」居里今夏不斷鞭策自己，新季將繼續與阿媽Sonya「豪賭」，每場由第2個Turnover開始，就要向母親支付100美元（約775港元）Shopping費用作為懲罰，藉此減少失誤。

與居里一樣，塘鵝球星戴維斯亦靠家人作為場上推動力，今夏將已過身的公公肖像紋上右手手臂，激發潛能：「公公係我籃球啟蒙老師，我哋互相稱呼大家做『Champ（冠軍）』，佢係高比拜仁球迷，我希望打波打到好似Kobe咁叻，等公公以我為榮！」塘鵝去季於西岸首圈季後賽被勇士橫掃出局，會方今季聘任勇士助教根特利掌舵，可預期這位「二五仔」定必有大把招數應付舊會。

占士打消炎針頂硬上 羅斯名錶贈畢拿

開鑼日另一場大戰，由公牛及騎士兩大東岸勁旅正面交鋒，一直有傳公牛後場孖寶戴歷羅斯及占美畢拿鬧不和，「牛魔王」為粉碎傳聞，昨向《芝加哥太陽時報》大爆已將1隻名貴靚錶送贈畢拿，作為獎勵後者去季的優異演出。至於騎士王牌勒邦占士，連日來都靠打消炎針紓緩背部痛楚，並於昨日投入操練，揚言明早開鑼戰肯定會落場。