體壇「出櫃風」愈刮愈勁，當中以「跳水王子」戴利前年喺YouTube親證「中途轉Gay」最轟動。呢位英國跳水「萬人迷」靚仔又有型，出櫃無疑傷盡天下女Fans心，本月頭戴利更宣布同大自己20年嘅奧斯卡金像編劇Dustin Lance Black訂婚。

除咗戴利，喺2013年頭Come Out嘅積遜哥連斯同樣搶盡風頭，呢位前NBA籃網球員，成為美國4大體育聯盟當中嘅首位現役同志，事後更獲得廣泛支持，就連美國總統奧巴馬都邀請佢出席國宴。

講到足球壇出櫃代表，必數前德國國腳希斯佩加。2013年掛靴嘅佢，上年頭宣布出櫃，佢承認自己近年先轉Gay，並因為擔心喺球圈畀人歧視，所以選擇掛靴後先Come Out。