昔日穿梭D-League（發展聯盟）及NBA的林書豪，自2012年吹起「林瘋」後人氣爆發，加上打了幾年NBA，如今加盟黃蜂已成為「大佬輩」球員，前晚J.Lin更於球迷日玩謝新仔，嚴選黃蜂「舞」林高手。

林書豪（右二）玩謝新人，老屈希斯頓、卡文斯基（左一、二）及華舒本（右）比「舞」。

承諾粉絲明年再訪華

NBA中國賽活動多多，前晚在東方體育中心舉行球迷日活動，壓軸出場的黃蜂續以林書豪做生招牌，J.Lin甫到場就客串MC，全程用國語與觀眾交流。

期間林書豪提議舉行跳舞比賽，老屈陣中3名新秀希斯頓、華舒本及卡文斯基落場比「舞」，明恰新仔。希斯頓與華舒本比「舞」期間尷尷尬尬，然而好戲在後頭，「跳得之人」卡文斯基一落場就狂騷Quali，又扭腰、又摸頭、又瞓地轉圈，輕鬆贏得黃蜂「Dancing King」殊榮。

林書豪事後得戚表示：「我做新秀嗰時都捱過，依家係時候到你哋畀我玩！」J.Lin於活動結束前向觀眾派發簽名波波，又承諾明年再度訪華，今次錯過中國賽的「瘋迷」，明年記住拉定筋捕「瘋」。