【方傑上海直擊】NBA中國賽下一站香港?昨晚假上海平治中心舉行的中國賽Round 2,黃蜂藉林書豪攻入13分,以113:71大勝快艇,J.Lin用行動證明自己夠料打正選。黃蜂班主米高佐敦再次現身,姚明及劉翔亦有到場,場內場邊星光熠熠。中國賽大成功,NBA中國CEO舒德偉昨揚言計劃把賽事移師香港舉行,屆時肯定掀起撲飛熱潮!

林書豪試圖突破格芬嘅防守。

中國賽焦點林書豪於深圳站大放異彩,昨晚在上海站再一次代表黃蜂向現場觀眾致詞,兼且獲正選上陣。J.Lin今仗繼續有「瘋」狂演出,命中兩球3分之餘,剷籃及急停跳射皆得手,個人獨取黃蜂頭10分,勁爆演出震撼整個平治中心。

表現更勝王牌甘巴獲加

雖然傷愈復出的快艇控衞基斯保羅有17分進帳,加上「入樽王」格芬貢獻「14+14」,然而黃蜂在巴頓、艾爾謝法臣及林書豪都有雙位數得分的情況下,最終以42分大勝,中國賽雙殺快艇。林書豪今仗表現比王牌甘巴獲加更好,新季極有機會「升呢」穩坐正選席位。

比賽好睇,場邊巨星亦夠睇頭,中、美籃壇Icon米高佐敦及姚明都有到場,當中「小巨人」更帶同老婆葉莉及囡囡齊齊睇波,另外「劉欄王」劉翔亦是座上客,今次中國賽星味堪稱歷屆最強。

NBA中國賽或移師香港

中國賽有聲有色,今年上海站更錄得破紀錄的60個賽事贊助,NBA中國CEO舒德偉(David Shoemaker)昨早受訪時稱,中國賽一定會陸續有來,並大爆已計劃與香港政府聯絡,研究將賽事安排在香港舉行。香港曾於2000年悉尼奧運前,於紅館舉辦鑽石盃,多國勁旅均有參賽備戰奧運,朗尼、拿殊及史杜積高域都有到港,不過若NBA中國賽落實在港舉行,矚目度肯定是歷來最強。