【方傑上海直擊】「書豪，機會嚟啦！」林書豪藉中國行掀起新一輪「瘋」暴，黃蜂主帥克利福德昨日轉軚，揚言會於今晚的NBA中國賽上海站派J.Lin擔正。「林瘋」彈起打正選，今晚單挑傷愈復出的快艇球星基斯保羅考牌，上位睇今鋪！

林書豪

（now630及635台周三晚8:00直播）

林書豪於深圳站大放異彩，帶領黃蜂擊敗快艇，就連球會班主米高佐敦都大讚「林瘋」，指J.Lin是今夏最佳收購。黃蜂昨午到上海平治球場進行公開操練，今夏指林書豪會打後備的教練克利福德突然轉軚，預告會安排林書豪擔正：「林書豪今場會打正選2號位，我想睇吓佢同其他正選球員會產生咩化學作用。」林書豪今晚夥拍甘巴獲加鎮守後場，如果再有爆炸性演出，新季隨時「升呢」奠定正選席位。

D佐敦笑稱想上海買樓

至於林書豪今晚對手基斯保羅，昨日已重新投入操練，右手食指傷勢已無大礙，預計今晚可聯同奧斯汀李華士齊齊復出，無疑是上海站球迷之福。快艇欲報卻深圳站一敗之仇，中鋒迪安迪佐敦（D佐敦）更於操練時喪操其弱項罰球，明顯對上海站賽事有備而來。

認真還認真，「D佐敦」依然不失搞笑本色，昨日受訪被問到今季目標時，該名快艇球員搞笑回應稱「想喺上海買樓」。有記者問該名百厭星會否希望與「波神」one on one，迪安迪佐敦即時擺出一副「濕滯樣」兼耍手擰頭，莫非驚輸得太甘？