關懷活動慘變「低頭騷」

快艇大軍昨日浩浩蕩蕩殺落上海平治球場出席關懷活動，向60位來自上海洋涇菊園實驗小學的「籃球小將」傳授必殺技。中鋒迪安迪佐敦甫到場便成為焦點，大啖大啖食爆穀，場面惹笑。

及後D佐敦、格芬及祖斯史密夫3大內線球員被編至一組教波，不過一眾「小學雞」肯定勁失望，事關3大球星大部分時間都埋頭篤手機，當中以祖斯史密夫最離譜，全程有9成時間撳手提電話，直情當班小學生透明。

皮雅斯教波最落力

反觀今日38歲牛一的皮雅斯最落力，上籃、射波、步法樣樣教到足，活動結束後身水身汗。名宿朗夏巴即使左手有傷亦未有「揸流攤」，堪稱球員典範。快艇與黃蜂明晚假平治球場再決高下，雙方今日均有公開操練，格芬、D佐敦、祖斯史密夫，畀心機練波啦！

至於深圳賽前手指骨折的快艇控衞基斯保羅，昨雖於關懷活動現身，但只是齋企吹水，食指仍然包紮着，雖然教練李華士稱CP3傷勢未有預期般嚴重，但預計上海站賽事未必會冒險上陣。倒是在練波時撞甩牙的奧斯汀李華士則無大礙。