【方傑深圳直擊】林書豪中國行上位!今季轉投黃蜂的J.Lin「瘋」雲再起,昨日於NBA中國賽深圳站搶盡風頭,球隊致詞、賽後記招瓣瓣撈勻之餘,更率領黃蜂以106:94砌低快艇,勁爆演出獲教練激讚。J.Lin靠中國賽發圍,難怪賽後意氣風發,大講髮型經兼自認最紅!方傑深圳直擊

林書豪打到爆缸。

「林瘋」於內地人氣爆燈,黃蜂直情當佢係生招牌,昨於中國賽開波前派J.Lin向現場球迷致詞,推高現場氣氛。林書豪用行動證明自己並非單靠亞洲人氣於NBA立足,昨日落場27分鐘攻入全隊最高的16分及交出4次助攻,鋒芒蓋過快艇雙星格芬及迪安迪佐敦,並協助黃蜂以12分擊敗快艇,打響中國賽頭炮。

賣口乖擦波神鞋

下半場不慎被對手撞到流鼻血的J.Lin,賽後獲克利福德激讚,該名黃蜂主帥更表明新季會安排更多攻勢讓林書豪負責,J.Lin今鋪上位啦!大紅人「林瘋」賽後代表黃蜂出席記者會,High到自認全隊最紅:「中國Fans好熱情,個個都拎住我啲波衫同海報搵我簽名,我覺得我係最紅嗰個。不過米高佐敦嘅受歡迎程度仲勁,簡直係神一樣!」認叻之餘又識賣口乖,J.Lin果然識撈。

下年再訪亞洲

被問到其雞冠新髮型,J.Lin表示:「我平時用3至5分鐘就Gel好,下年我會再嚟亞洲,到時會同屋企人夾一夾,飛埋同一款髮型嚟同大家見面。」黃蜂與快艇昨晚已飛赴上海,準備後日的上海站賽事。