「Lob City（空接之城）」鋤爆深圳！萬眾期待的NBA中國賽今午假深圳Tip Off，快艇與黃蜂會於大運中心正面交鋒。玩「拆你屋」玩到出神入化的快艇，有「暴力入樽王」格芬及迪安迪佐敦（D佐敦）瘋狂鋤樽，黃蜂則有「籃球之神」米高佐敦監場，加上林書豪首次出戰中國賽，今次深圳站可謂大把好戲，I love this game！

NBA致力推動國際化，列強近年紛紛到訪世界各地出戰季前賽，擁有龐大NBA球迷的中國更是聯盟的重點推廣市場，今年舉行第9屆中國賽當然要隆重其事，特別安排有三巨頭基斯保羅、格芬及迪安迪佐敦坐陣的快艇，火併「波神」米高佐敦旗下的黃蜂。雙方上周四抵埗後，已多次露面出席關懷活動及接受訪問，搞熱深圳氣氛。

格芬鬥速龍「鋤冧」籃板

新季力爭NBA總冠軍的快艇，季前於轉會市場大手掃貨，簽入祖斯史密夫及後日38歲牛一的皮雅斯，不過講到全隊焦點，必數新、舊「入樽王」格芬及迪安迪佐敦！2011年入樽賽冠軍格芬，上季開始側重中投得分，不過入樽能力依舊勁爆，上周日於溫哥華與速龍拍跳時，就以一記雙手暴力入樽「鋤冧」籃板上的24秒大鐘，睇到全場「嘩嘩聲」。其內線拍檔迪安迪佐敦亦屬鋤得之人，「Lob City」今日勢必鋤爆樽Show Off。

黃蜂亦大把睇頭，老闆米高佐敦今日會到場睇波，新加盟的亞洲人氣王林書豪亦會首次於中國賽亮相，新秀前鋒卡文斯基要趁機博表現取悅主帥克利福德，加上甘巴獲加及艾爾謝法臣兩大主將，今場中國賽肯定過癮。