祖高域「舞王上身」玩轉美網！這位最鍾意搞搞震的世界「一哥」，不僅「助攻」好友求婚贏得美人歸，周四打入男單32強後更「與粉共舞」，辣紐約，睇到在場球迷捧腹大笑！「扮嘢祖」下仗迎戰意大利薛比料可繼續過關。

祖高域同識咗5年嘅Fans齊齊跳奇怪舞，鬼咁開心。（法新社圖片）

（now676台周六凌晨零時直播）

已為人父的祖高域愈來愈貪玩，今次出戰美網就連場出Show搶盡風頭。話說開鑼前夕，他與團隊在中央場訓練期間突然做「影帝」，假扮發嬲跟友人女伴嗌交，實質為製造機會給朋友英雄救美，最終更求婚成功，開心到「一哥」在旁呱呱叫，還在facebook上載該段視頻祝福一對新人：「好開心能扮演呢個重要角色。」

即使開賽之後，「扮嘢祖」心情依然未見緊張，可能是頭兩圈贏得太輕鬆。他昨日以6:4、6:2、6:1淘汰奧地利梅里，接受現場訪問時突然邀請一名肥佬粉絲落場齊齊「Fing」衫共舞，兩個「麻甩佬」跳得勁High，場面搞笑！這位球迷並為「一哥」着上「I LOVE NY」（我愛紐約）T-shirt，之後搭住膊頭接受全場掌聲。祖高域表示：「我識咗佢5年喇，年年都會有一場比賽見到佢除衫跳舞，佢帶到好多歡樂畀大家！」

細威拿度險勝過關

同日西班牙「天王」拿度雖然送出40次主動失誤，幸仍以7:6（7:5）、6:3、7:5力克阿根廷的積遜舒華斯曼打入第3圈，反觀「舒娃前男友」迪米杜夫就以盤數2:3不敵哈薩克古古舒堅，64強止步。女單方面，力爭「單季全滿貫」的S威廉絲面對荷蘭貝婷絲略見波瀾，第一盤「搶七」逆轉後才以7:6（7:5）、6:3涉險入第3圈。

另外，儘管瑞士「天王」費達拿早已讓出世界第一寶座，而且近3年都再未捧過大滿貫錦標，不過「吸金力」依然傲視同儕，連續9年榮登網壇「賺錢王」。

費達拿繼續做吸金王

《福布斯》雜誌統計由2014年7月1日至2015年7月1日各球星收入狀況，包括場上獎金及場外代言收入。身上有多達10個代言合約的「費天王」靠商業廣告搵飯食，以6,700萬美元（約5.2億港元）拋離祖高域（約3.7億港元）及拿度（約2.5億港元）高踞第1位。至於排第4位的「失戀天后」舒拉寶娃場內成績雖不及「細威」，不過卻賺了2,970萬美元（約2.3億港元）「險勝」S威廉絲（約1.9億港元），成為收入最高女子網球手。