百年歷史電車被指「阻住前進」、「元朗米」亦因收地恐成絕響，發展二字在香港大過天，元朗中場葉子俊家族長居元朗八鄉，發展的巨輪早已輾過這片鄉土，這位原居民親歷水貨客「入侵」大馬路、高鐵工程毀掉滿載童年回憶的農地，卻始終心繫家鄉拒絕「撤離」；「子俊」對足球同樣堅守，生涯多年來雖叫好不叫座，但仍執意今季在元朗再闖一片天！

「呢檔腸粉好食，平時通常老闆娘看舖；後面仲有間拉麵，練完波成日食，好正o架！」走進錯綜複雜的元朗內街，葉子俊隨口數出大堆「元朗人」才認識的美食，若非這位原居民帶領，記者恐怕早已迷路。

慨嘆家鄉經歷巨變

「子俊」在元朗成長，自小發球星夢的他年少時常與朋友到區內街場「跟隊」，但這片土地近年已經歷巨變：「之前真係好亂，好多水貨客，行人路根本行唔到！有無見過『7仔』會執？執咗兩日就變咗藥房。」

近年常惹爭議的高鐵工程，亦「入侵」葉子俊所居的村落：「我住嗰度以前全部田嚟，依家幾十畂都係地盤，環境好差，好唔鍾意，細個踩單車啲路都封咗！」

元朗自然風光買少見少，這位中場雖不捨，亦只好接受：「會懷念以前少啲人嗰陣，有人話遲啲大棠同南生圍會收嚟起樓，所以依家會去多啲……要發展，都無辦法。」但「子俊」未有打算離開這片成長樂土：「對元朗有感情嘛，由細玩到大嘅朋友都喺度，只要繼續留喺香港，就唔會搬出去。」

盃賽都照殺

歲月催人，除家園經歷巨變，葉子俊亦已步入球員生涯晚期，他効力屯門及太陽飛馬時球技均備受讚賞，惟除在「摩力克時代」短暫入選港隊外，就未有太多亮點，上兩季効力以豪門形象示人的太陽飛馬又與錦標無緣，「子俊」亦感無奈：「當時對（太陽）飛馬好有期望，因為係最當打嗰幾年，仲想喺飛馬踢到唔踢為止，球會所有嘢都好專業、球員高水準，諗住一定攞到冠軍，好可惜……離開時都有諗過係咪已經發完夢。」今季加盟家鄉球隊元朗，規模雖不及舊東家，但他仍拒絕放棄爭標：「攞聯賽冠軍一定好難，睇吓盃賽有無機會，點都要抱住希望！」