「巨無霸」退役多年，但轉做「講波佬」後繼續緊貼籃壇，這位《TNT》名嘴率先為新球季做預測，睇好衞冕的勇士和馬刺，並點名大讚帝王球星古辛斯是NBA「冧巴溫」中鋒！

奧尼爾指勇士幾乎留住所有奪冠球員，靠「浪花兄弟」帶領有能力再度問鼎總冠軍，至於季前引入艾德列治的馬刺，亦被「巨無霸」視為奪冠熱門。奧尼爾「跟紅頂白」，不過被問到誰是當今NBA最佳中鋒，奧尼爾就揀選麻煩多多的古辛斯，認真「估佢唔到」，查實「Shaq」是帝王股東之一，當然要撐自己友！

拓荒者球星米克米拿是能量飲料L.I.F.E.創辦人，今次委託奧尼爾擔任宣傳大使可謂「搵啱人」，「巨無霸」昨於記者會有求必應，影相、簽名永無托手肘，更High到將1位少女「成份舉起」，貫徹其開心果作風。

「大帝」香港出沒注意

雖然夏日炎炎，「Shaq」仍無黑面，昨日到灣仔連踩兩間7仔掃近百罐L.I.F.E.飲料，然後於修頓室內場館外玩「快閃」派飲品，奧尼爾大汗疊細汗請街坊「飲嘢」，米克米拿好橋喎！米克米拿表示，若有機會會搵好友勒邦占士幫手宣傳，意味「大帝」極可能跟隨「巨無霸」步伐訪港，fans要留意喇！