車路士女軍醫風波愈搞愈大鑊,據英國《每日郵報》爆料,剛啱被莫連奴燉冬菇嘅巴西靚女軍醫Eva,準備將事件搬上法庭,就連老闆阿布拉莫域都驚呢單嘢會影響球會形象,唔通莫帥今鋪真係要跪低?

「藍戰士」首輪英超失分畀史雲斯,莫連奴公開批評Eva喺比賽末段入場治理夏薩特嘅決定,呢位靚女軍醫事後喺社交網答謝Fans支持,隨即被「寸王」禁止跟隊操練同比賽日坐喺後備席。獲英超軍醫聯會力撐嘅Eva,覺得呢個靚女嘅專業受到質疑,要求莫連奴公開道歉,又尋求法律意見,睇吓點樣控告車路士同莫連奴。

前車仔軍醫批Eva博出位

雖然唔少人都撐Eva,車路士老闆阿布亦因為呢單嘢嬲爆,為保護球會形象準備「庭外和解」息事寧人,不過莫連奴都唔係冇人撐嘅,前「藍戰士」軍醫、現時喺NBA擔任醫學顧問嘅羅渣士就指Eva想搏出位做「明星軍醫」,仲話:「喺facebook多謝外界支持太天真,你想博咩呀?記住你係軍醫嚟,認清自己嘅位置,你冇可能大得過主帥。」