提到張健峰，相信球迷會聯想到「GPS峰」這個新花朵，又或者記得他是球圈「手段哥」，每逢大節日都會「出招」氹嬌妻Pecky開心。但其實今季上「山」効力南華的「張峰」，亦是球圈出名的好爸爸，教仔跟左路出波同樣耍家！

張健峰非常珍惜與囝囝相聚的時間。（相片由受訪者提供）

可能受年幼時爸爸長期在海外工作之影響，「張峰」十分珍惜與兒子相聚的時間。「球圈好爸爸？我唔敢當！大把爸爸比我做得更好！只係我好清楚，做囝囝好掛住爸爸嗰種感覺係點，所以我依家會盡量唔令個仔唔開心。」「張峰」表示，雖然在香港當職業足球員的工時不算長，但一年中總有一些時間需要離開香港，包括出外集訓和比賽等。所以平日會爭取時間接送愛兒「晉珞」返學、放學。「其實過程時間好短，但兩仔爺一路行、一路傾吓偈，問吓佢學校有咩事發生，或者佢問吓我球隊嘅事，感覺好舒服，唔止阿仔開心，我自己都好滿足。」

唔局限囝囝運動發展

之前「晉珞」學校邀請「張峰」參與一個職業介紹的活動，分享當職業足球員的感受，「張峰」不消考慮便答應出席。「當住幾十人，包括小朋友同老師面前講嘢，係有啲難為情，不過見到阿仔望住我嘅眼神，同佢燦爛嘅笑容，咩都值番晒啦！」「張峰」謂。

據「張峰」太太Pecky所講，洋名Aiden的「晉珞」盡得父母真傳，充滿運動細胞（「張峰」除足球外，亦精於籃球、排球、乒乓球和桌球，Pecky本身亦是排球健將）。「張峰」為讓Aiden體驗不同運動之樂趣，從不會局限其發展，特別催谷他參與單一運動，「張峰」說：「佢得幾歲人仔，無必要咁早限定佢玩乜運動，佢鍾意玩咩就陪佢玩咩，大啲佢自己會揀啦！可能佢可以瓣瓣精呢？哈！哈！」

用集訓國家教世界地理

「張峰」還有一招值得各位爸爸「偷師」，就是運用囝囝對爸爸的關心來進行「活動教學」。「我哋屋企有幅好大嘅世界地圖，Aiden好鍾意記低我去過邊度比賽或者集訓，我返到屋企，佢就會好仔細咁問我要飛幾多個鐘，或者去嗰度熱定凍、啲人講咩話、咩膚色等等。過程中，唔止令Aiden更加了解我嘅工作，久而久之，亦增加咗佢對世界地理嘅認識同興趣。」上個月，「張峰」就與Pecky和Aiden組成「一家三口旅行團」，到泰國芭堤雅旅行，除吃喝玩樂外，亦安排Aiden參加各式各樣的活動，包括與海豚近距離接觸等，讓兒子度過一個有所得着的假期。

各位爸爸級球迷，假如未來有機會遇到「張峰」，不要一味與他傾波經，彼此研究一下「湊仔經」、「教仔經」，肯定會有更多話題。

文：大頭