昔日以拚搏打法被封「小老虎」的中國女排名將孫玥，做了母親後未有成為「虎媽」，反變成一位真正的「慈母」。面對兩個寶貝囡，孫玥坦言有時「冇佢哋咁好氣」，更表示湊女比打排球更辛苦，但就有「特別的湊女技巧」，亦會利用教波及上教練課的機會趁機「抖吓氣」。文：Flora 攝：高詩琦

孫玥除了打排球勁，「教囡囡」亦有一手。

曾是90年代中國女排代表人物的孫玥，退役後跟隨丈夫何國文來港定居五年半，早已修心養性全心全意湊女：「大女嘉琪四歲幾，細女嘉睿兩歲多，老公工作又忙，未能幫手，我很多時都忙於湊女，很少私人時間。」

唔會逼囡囡打排球

孫玥自稱有「特別的湊女技巧」：「大女比較硬頸，更是為No而No，例如叫她做功課，她會說『我唔做喎！』，所以想她做一件事，我會話『你唔好做呀』，她就會去做，這些都是做媽媽的技巧。」細女反而懂得「睇人面色」：「細女比較黐身，亦好識做，見我嬲就會氹我『媽咪，我會乖，我下次唔敢。』所以老公經常話我好縱細女。」

現今「怪獸家長」當道，孫玥又會否「順應潮流」，為囡囡報讀大量興趣班？「兩個都非常好動，都想她們學打排球，她們身形高大，不打『好嘥』，但要等再大一點再算。大女正學游水，跳舞和畫畫是因為她喜歡才去學，上補習班就只有學英文。我不會要求兩個女讀書好叻，只想她們開心健康成長。現今香港小朋友都被過分催谷，替他們辛苦，其實未來有很多出路，不一定要靠讀書。」

復出打波教波當抖氣

雖然兩個囡囡活潑又可愛，但每天只忙着照顧她們亦略嫌單調，因此孫玥去年開始「復出」：「除了跟本地一支甲二球隊一起打波，現時亦在拔萃女書院擔任兼職排球教練，剛剛就完成國際一級教練班課程。」不過無論打波、教波抑或上堂，大前提是有人幫手湊女，否則就不會外出，果然是廿四孝媽咪！

相比湊女，她覺得教波一點也不辛苦：「班學生打波好用心去學，所以我會很有耐性、不厭其煩地講解。反而對囡囡會比較心急，有時忟憎就會離家一陣，冷靜下來。所以出去打波同教波，都是讓我抖氣的機會。」雖然老土，但也不得不說句，為人母親真的甚艱難！