在香港，泰拳冠軍金腰帶不能當飯食，全職拳手絕無僅有，要靠打拳發達更加難過登天。然而羅祖勝卻夢想打拳致富，他說：「行行出狀元，我好崇拜老闆『風之子』杜恒霖，佢打泰拳打到揸法拉利，我都好想學佢，不過我嘅Dream Car係林寶堅尼！」

羅祖勝現時除了定期上擂台比賽，平時每日會由天水圍居所乘車到銅鑼灣的拳館上班，客串教拳賺生活費，他說：「我好享受依家嘅生活模式，每次上擂台都係我揚名立萬嘅機會，我希望挑戰更強嘅對手，目標係喺國際拳壇打響名堂。」談到夢想，「四海」揚言要做第二個「風之子」：「杜師傅打拳勁又識做生意，搞拳賽開拳館開餐廳瓣瓣掂，我將來都要好似佢咁威！」