童話「醜小鴨」人所共知，原來香港搏擊界亦有「醜小鴨」真人版！故事主角是年僅20歲的香港拳王羅祖勝，外號「四海」的他發育時期嚴重癡肥，16歲高峰期體重超過240磅，異性緣欠奉之餘更出奇地經常「畀人蝦」，幸好他下定決心投身搏擊訓練辣操後重獲新生，踏足擂台更找到自我及人生目標，剛揭開擂台搏擊生涯的第一章，「四海」已由昔日醜小鴨變天鵝！

羅祖勝踢走大肥仔形象，變身香港拳王。

圖/文：Martin（部分圖片由受訪者提供）

一餐鯨吞10碗飯

看着今時今日身材健碩的羅祖勝，難以想像其少年時期竟是終日被欺負的「大肥仔」，他說：「屋企老人家都好錫我，惟恐我食唔飽畀我放任咁食，一餐可以鯨吞10碗飯，結果變成大肥仔。加上讀書成績差，喺學校終日畀人蝦之餘，最慘係冇女仔鍾意！」

18歲12戰全勝稱霸

為避免變成「肥毒男」，羅祖勝下定決心學拳，他謂：「阿媽送我去佛山拳館學自由搏擊，當時一心諗住學好功夫，可以向蝦我嘅人報復，二來又想操Fit啲識到女仔。不過我好快已經發現，原來擂台就係我嘅一切。」羅祖勝在拳館所吃的苦完全超乎想像，一年半內由240磅激減至160磅，成為香港罕有的重磅泰拳選手，當初報復、拍拖之心亦已放下，18歲時更以12戰全勝佳績，登上香港泰拳冠軍寶座。

周二鬥泰國新星

踏足擂台令「四海」變得積極，昔日拿起書本都會睡着的他，現在卻要為考取搏擊專業教練牌而苦讀。搏擊令他變得自信，甚至信心爆棚得誇口豪言：「我從來唔會將香港對手放喺眼內，原因係我受嘅苦，根本係其他人冇辦法想像嘅！」羅祖勝下一個目標是進軍國際拳壇，周二（28日）晚於九展舉行的「TOPKING X 崑崙決世界巡迴賽──決賽」迎戰泰國新星通猜，相信便是「四海」振翅高飛的好機會。