蓮花首腦撐「港產車神」！蓮花CEO卡特（Matthew Carter）昨日就英國網站《VICE Sports》抨擊車隊對實習車手的選擇作出反駁，力撐「港產車神」方駿宇（Adderly）絕對有實力成為F1車手，並有望季尾再於F1練習賽中登場。至於Adderly面對車隊財困消息，表示不會顧慮太多，只求盡力做好本分。

雖然蓮花車隊傳出財困問題，但方駿宇一於少理。

蓮花CEO卡特力撐Adderly有力成為F1車手。

有望季尾再戰練習賽

《VICE Sports》日前撰文抨擊蓮花，指方駿宇及西班牙女車手卡文祖達，於GP3表現麻麻，絕無「升呢」鬥F1的實力，蓮花只是想利用二人「獨特」身份，尋求曝光率換取更多贊助。卡特回應時強調兩位實習車手的GP3戰績並不重要：「我哋揀佢兩個做實習車手，係因為我哋相信佢哋有能力駕馭到F1戰車，所以Adderly同Carmen嚟到幫手研發賽車時，佢哋喺GP3或者其他賽事嘅成績都變得唔重要。」

這位去年1月才上任的CEO又大讚Adderly：「我相信佢未來可以成為一個好好嘅車手。佢現時仲有好多F1嘅嘢要學，但佢喺賽車模擬器表現不錯，我哋會不斷檢討，希望Adderly繼去年阿布扎比站後，季尾可再親身落場，參與周五練習賽。」談到「港產車神」何時可成為正式F1車手，卡特表示全看Adderly的成長速度，但稱讚他學習速度快，未來幾年應該會有成果。

懶理車隊財困Adderly無意跳船

至於車隊日前因財困鬧上法庭一事，卡特並未作出回應。繼續為車隊用賽車模擬器試新零件的Adderly則謂：「車隊過埋今年點變冇人知，所以都係盡力做好今年嘅工作。聽講下年蓮花變化都幾大，但都未知會發生咩事。」他澄清日前賽完GP3英國站後與印度力量車隊主席馬拉亞會面，只是擴充人脈，並非因蓮花出問題而想「跳船」。Adderly今日經已回港，下周一（13日）轉往日本靜崗懸富士國際賽車場，出戰GT亞洲系列賽第3站，可望繼岡山站奪冠後再下一城。

李榮康英國直擊