方駿宇（Adderly）輸車、領隊「戥佢唔抵」！這位「港產車神」日前在GP3英國站排位賽，取得今年最佳成績第7位，可惜未能將佳態延續到兩回合正賽，只能以第12及14名完成賽事。儘管已是開季以來綜合最佳名次，卻始終仍未有分落袋，難怪失望的Adderly賽後坦承成績麻麻之餘，就連車隊「型佬領隊」都「戥佢唔抵」！

方駿宇難得排靚位起步，可惜未能取得佳績。

兩回合僅得第12、14名

Adderly於英國時間上周六傍晚舉行的首回合，以第7位起步即出現失誤令排名下跌，到第2圈出彎時再度犯錯跌至第12位，縱然隨後發力狂追，惟始終未能收復失地只得第12名。到昨日舉行的次回合，這位「港產車神」只能以第14名衝線，開季3戰依然未有分落袋。

雖然對成績失望，惟Adderly賽後表示今站仍有不少得着：「今次成績一般，但都學到唔少輪胎管理嘅知識，事關F1對養胎嘅要求更大，所以有唔少得着。」雖然今站取得今季GP3個人最佳排位及成績，然而Adderly顯然未滿意：「仲有好大進步空間，雖然排位上有少少進步，但始終比賽成績先係最重要，所以嚟緊要做得更好。」

獲益良多盼繼續進步

難得首戰以第7名起步卻未能取得佳績，無怪Adderly効力的Koiranen GP車隊「型佬領隊」蘇文（Jan Sumann）都「戥佢唔抵」，他說：「佢喺排位賽表現得好好，可惜唔能夠將表現帶到正賽。希望Adderly下場可以再排好位，飆入前10攞到分啦！」

對於Adderly的整體水平，蘇文如此評價：「Adderly份人好似冇乜壓力咁，我好鍾意佢嘅態度。佢對於高速彎嘅處理係有一手，今年餘下賽程仲有幾條高速賽道畀佢發揮。佢喺精神層面上雖然唔錯，不過技術層面上仲要繼續努力。」完成英國站後，Adderly會繼續留英，今日更會到牛津大學體育中心進行體能訓練。