世界級球星唔怕豬一般嘅隊友，最怕搞搞震嘅星爸星媽！體壇著名運動員受萬人景仰，行起步路都有型有款，不過做人好難樣樣咁順境，正當呢班「萬人迷」威盡全球，成為眾人偶像嘅時候，偏偏總出現「甩漏」，畀人破壞形象，仲要係自己阿爸阿媽一手搞掂，情況比隊友擺烏龍，更加欲哭無淚，只差未當場激到吐血而死。

占士（資料圖片）

占士騷媽處處留情

「來吧我甚麼都應承，來吧我是騷得要命！」首歌葉玉卿唱就正，但換咗係勒邦占士媽哥莉亞唱，唔知你又點睇呢？哥莉亞含辛茹苦湊大「大帝」，占士梗係錫晒佢啦，點知哥莉亞就想囝囝嘅隊友錫佢多啲。早於2010年，哥莉亞就被揭發同騎士球員韋斯有路，到今年頭就同熱火控球後衞查馬斯傳緋聞，仲有傳呢個係占士離開熱火嘅主因添。大佬，你個仔有錢有面，係要男人都去第二度搵食吖！

C朗有個土豪媽

就算係錢多，都唔好亂使，C朗個仔係咪「敗家仔」就未知，但就肯定有個「敗家老母」！C朗媽Dolores不嬲勁豪，身上絕對唔止得「八両金」，早前佢搭飛機離開馬德里市嗰陣，身上現兜兜有成5.5萬歐元，但並冇向海關申報，仲要畀人發現，結果被充公4.5萬歐元（約39萬港元），淨係拎得番1萬歐元離境。咁樣搞一搞就冇咗幾十萬港紙，點搞呀你！

加利仔老竇衰鹹濕

就算冇速度、走得慢、唔夠快，都冇咩所謂，踢波唔醒唔係罪，加利佬多年來畀人笑，佢都一笑置之，不過兩年前佢老竇涉嫌性侵犯一名40歲女子，加利佬就堅笑唔出。2013年，老尼維利被指喺車中借醉侵犯一名女子，單嘢上晒法庭，加利佬日日都畀記者追住問，乜face都冇晒。雖然老尼維利最後被判無罪，但加利佬已被折磨到不似人形。

Hea碧賤爸輪姦少女

加利佬老竇無罪釋放，不過貝碧托夫阿爸就冇咁好彩，做咗兩年監躉！「Hea碧」老父艾雲衰鹹濕，後生做球員時，夾埋6個隊友輪姦一個挪威女仔，真係聽到都覺得無恥，坐得嗰兩年監，都算坐得少啦！

泰利蠢爸賣可卡因斷正

泰利曾經勾義嫂、又試過種族歧視，阿仔表現咁「突出」，做老竇點可以唔肉緊啲。泰利阿爸特德2010年喺夜店售賣可卡因，畀放蛇記者捉到正，售價為120鎊，期間佢多次同人講，唔好話畀人聽泰利老竇賣可卡因喎，真係叻仔到呢！雖然成個過程被拍低晒，但特德竟然唔使坐監，只係判緩刑半年另加100小時社會服務令。