機霸變車神，「A貨咸仔」要做自己！來自威爾斯的23歲車手馬頓保於2011年憑PlayStation賽車遊戲Grand Turismo（GT）打出名堂，踏上職業車手路，去年更贏得GP3分站冠軍，一躍成為英國車壇超新星。雖然外貌、聲線與平治「黑帝」咸美頓似到十足十，但馬頓保話要「做番自己」，誓圓F1夢！「A貨咸仔」今於GP3英國站次回合再與「港產車神」方駿宇互鍊，激戰可期！

馬頓保昨戴黑超接受訪問，星味爆燈。

「A貨咸仔」老竇

係英格蘭足球員

馬頓保父親Steve是名不經傳的前英格蘭足球員，不過他未有選擇「繼承父業」，只醉心賽車，不諱言若2011年沒有參加GT舉辦的GT Academy ，根本不會成為賽車手：「我由細到大嘅夢想都係做F1車手，不過唔係GT Academy，我唔會成為職業車手，或者會做個室內設計師。 馬頓保打機打到出神入化，當年擊敗逾9萬名參賽者成為GT Academy第3位冠軍，贏得職業車手合約，由「機霸」升呢成為車壇新貴！

別以為馬頓保「得個樣」，畢業「地標戰」杜拜24小時耐力賽，他在自己級別就以第3完成賽事。累積兩年經驗後，正式進軍F3，向夢想進發。2014年馬頓保代表Arden International首戰被視為F1預備組的GP3，分別取得德國站冠軍及匈牙利站季軍，全季總排名位列第9。

排位賽失準

今次回合鬥方駿宇

由於馬頓保外貌及聲線勁似「黑帝」，「A貨咸仔」之名不逕而走，也令他特別受到外界關注，這位被英媒列為全球50大最具市場價值運動員的「機霸」，昨接受訪問談及此話題時，也不禁失笑：「好多人都話我似佢，咁我個樣同把聲就係咁嘛，是但啦，哈哈……不過我其實只係想做番自己。」希望兩年內闖入F1殿堂的馬頓保又說：「我冇特別鍾意一個F1車手，佢哋每個都有值得欣賞嘅地方，好似Lewis（咸美頓）跑法進取好有侵略性，係我心目中嘅英雄，佢鬥GP2嗰陣我已經好留意佢；Kimi（拉哥倫）就場內場外都好有個性，Sebastian（維度爾）就夠謙遜全面。」

今年轉投Carlin車隊的馬頓保短期目標鎖定GP3總冠軍，不過目前位居車手榜第5的他，昨在地頭銀石上陣表現失準，排位賽只造出1分48秒204，首回合排第14位起步。「A貨咸仔」和方駿宇今於香港時間下午3時25分上演的次回合將再同場比併。