方駿宇（Adderly）「Fit到漏油」重返銀石爭佳績！這位早前贏得GT亞洲系列賽日本岡山站次回合冠軍的「港產車神」，返回自己F3生涯的「起步點」銀石賽道，出戰GP3英國站賽事，滿載美好回憶的Adderly豪言「熟晒路」，而且收身成功自覺Fit到爆，信心大增，誓要再創好成績。

方駿宇坦言對銀石賽道「熟晒路」。

重回起點意義重大

Adderly賽完GT亞洲系列賽後由日本返港只小休兩天，周三出發赴英備戰GP3，他前日更踩場視察環境，還忍不住在這條他口中「最喜愛的賽道」Selfie留念。這位25歲車手昨日在練習賽前接受本報訪問時表示，回到F3起跑點意義重大，又稱回到銀石信心大增，有望造出比前兩站要好的成績：「08年起就喺呢度第一次F3試車，返到嚟自己熟悉嘅場地，充滿住美好回憶，信心都大啲。」

談到在銀石最難忘的事，Adderly表示非2011年GP3練習賽莫屬：「雖然當時只係練習賽，但係好大雨，唔識點造出快嘅圈速，所有（雨天比賽）嘅嘢，都係喺呢度學番嚟。」過去數月積極狂操的方駿宇成功減磅，「成塊面削晒」，他亦笑言：「愈操愈Fit，雖然唔知輕咗幾多，但感覺Fit到漏油。」Adderly今早香港時間8時45分將參加GP3練習賽，下午4時20分出擊首回合賽事。