「海嘯遺孤」做C朗接班人！04年南亞海嘯被捲入大海嘅馬杜尼斯，當年獲救嗰陣身穿葡萄牙國家隊球衣，因而引起C朗關注。呢位17歲印尼少年，過去11年獲C朗全力輔助踏上足球路，尋日終於獲偶像母會士砵亭簽入，演繹球壇勵志故事！

南亞海嘯造成超過23萬人死亡，馬杜尼斯嘅媽媽同兩位兄弟都葬身大海，佢流落荒島21日期間靠飲污水撐住僥倖生還，最後奇迹獲救。當時着住老翻葡萄牙10號波衫嘅馬杜尼斯話：「我唔驚，因為我要見番家人，將來要做職業足球員！」呢番說話令葡國球壇大受感動，以C朗、尤西比奧為首嘅名將，紛紛去印尼探望馬杜尼斯，當中C朗除咗出錢幫馬杜尼斯重建家園之外，亦周不時探吓呢位「契仔」。

着番C朗28號波衫

有巨星「契爺」支持，士砵亭尋日高調開記招，宣布簽馬杜尼斯入青年軍。馬杜尼斯亦揀咗C朗出道時嘅28號波衫，並喺自己個名後面加個「CR」字樣，向C朗致敬：「我真係好開心，士砵亭令我夢想成真，亦好多謝C朗！」士砵亭青訓系統曾出產費高、C朗、拿尼、哥利斯馬等出色翼鋒，馬杜尼斯勢必展翅高飛。