平治「黑帝」咸美頓昨日重返奪得F1首勝的福地─加拿大站韋倫紐夫賽車場，於正賽由頭帶到尾，以1小時31分53秒首先迎接格仔旗，奪得今季個人第4個分站冠軍，並力阻隊友洛辛保取得3連勝。

咸美頓贏得個人今季第4個分站冠軍。（美聯社圖片）

咸美頓2010年在韋倫紐夫賽車場取得F1生涯首勝，今戰重回「福地」，排頭位出賽的「黑帝」以2秒擊敗洛辛保奪魁。平治雙雄今季第4度「包Q」，威廉士的保迪斯就取得季軍。「咸仔」賽後聲稱贏得不輕鬆：「今場戰車成日出現轉向不足，搞到我好大壓力，洛辛保真係好快，但係我成場控制住戰局，所以表現都算過得去。」

畢頓嗌人炸爛架車

平治成為大贏家，相反麥拿侖車隊表現就令人失望。阿倫素及畢頓今站都未能完成比賽，退出前齊向車隊工程師發牢騷。阿倫素狠批戰車令自己表現如業餘賽車手，畢頓就向工程師說：「叫車隊所有人一人拎住一個手榴彈炸爛架車佢啦！」今戰過後，一眾車隊將有近兩周休息時間，麥拿侖已表明會在這段時間盡力改善戰車性能，希望在奧地利站有好表現。