「破壞之王」單挑史堤芬居里！隨住艾榮打柴緣盡餘下的NBA總決賽，澳洲球員迪拉維度華順理成章頂替「Uncle Drew」，出任騎士正選控衞。這位「那渣控衞」今季季後賽「壞事做盡」，先後「搞死」泰查吉遜、高華及荷福特，各位「咖喱躉」要有心理準備！

「破壞王」迪拉維度華出任騎士正選控衞，勇士球員有難。（美聯社圖片）

艾榮起碼抖3個月

艾榮於Game1傷出並證實左膝骨折，他昨日完成手術，預計要抖3至4個月，直至下季訓練營才會復操。餘下賽事頂替艾榮出任正選的澳洲籍控衞迪拉維度華，於東岸準決賽試過挑釁泰查吉遜，導致該名公牛前鋒被逐，及後在東岸決賽鬥鷹隊時，除了重施故技令對方中鋒荷福特領二級犯規離場外，更撞到鷹隊「3分王」高華要提早收咧，堪稱「破壞之王」。

不過，與迪拉維度華對位的勇士球星居里就坦言未驚過，這位常規賽MVP稱：「邊個嘜我都一樣，我唔會改變打法。」「咖喱仔」認為，只要勇士繼續逼到勒邦占士要單打獨鬥，球隊就有機會贏波。

（now635台周一早上8:00直播Game2）