騎士輸波,「大帝」雙拳難敵四手!萬眾期待的NBA總決賽昨日揭開戰幔,騎士縱有勒邦占士攻入個人總決賽新高44分,奈何好拍檔艾榮因傷退下火線,兼且對手「浪花兄弟」繼續有高水準演出,結果勇士加時以108:100反勝騎士,總決賽先拔頭籌!

占士(藍衫)被勇士球員夾擊,加時冇啖好食。(美聯社圖片)

常規賽MVP居里又發威。(法新社圖片)

Uncle Drew 球員通道掟衫爆粗

東岸盟主騎士開賽初段「係威係勢」,一度領先對手14分之多,不過勇士站穩陣腳後起勢反撲,騎士於比賽末段表現亦走樣,加上占士最後一擊「炒粉」,雙方激戰4節後打成98分平手。「大帝」昨仗造出「44+8+6」超級數據,但加時明顯跌Watt,星級控衞艾榮又因膝傷退下火線,令騎士攻擊力大減,加時階段全隊僅得2分進帳,勇士就藉「浪花兄弟」史堤芬居里及奇利湯臣分別貢獻26分及21分,以8分反勝,總比數領先1:0。

早於東岸決賽已因膝傷休戰兩場的艾榮,黑氣未除,昨仗不慎扭傷左膝,由於「Uncle Drew」離場時於球員通道內掟波衫兼爆粗發洩,美媒均揣測該名騎士球星傷勢應是「大鑊嘢」!賽後需撐拐杖離開球場的艾榮,今日會接受磁力共振檢查,周一早上能否於Game2披甲成疑。