年屆37歲的皮雅斯昨於東岸準決賽搶盡風頭，最後關頭射入撞板壓哨球，協助巫師主場以103:101絕殺鷹隊，總比數領先2:1。與勒邦占士齊齊成為近10季NBA當中兩度於季後賽絕殺得手的皮雅斯，賽後寸爆回應鷹隊小將舒洛達的「符碌」言論，果然薑愈老愈辣！

巫師老將皮雅斯（中）射入致勝壓哨球興奮莫名。（美聯社圖片）

巫帥昨於第4節一度領先對手21分，但被鷹隊隨後打出一段21:3的攻勢將比數扳平。不過，皮雅斯在最後一擊時盡顯球星功架，被兩名鷹隊球員夾擊下命中「撞板」波，帶領巫師險勝2分。賽後皮雅斯稱：「我哋尋日先新增呢個戰術（最後一擊），我係為咗統治戰場而嚟！」被鷹隊小將舒洛達寸絕殺帶「符碌」成分的皮雅斯，更意氣風發回擊：「可能舒洛達喺2K遊戲入面用我射唔入，所以發爛渣。」

灰熊挫勇士反先2:1

西岸方面，灰熊憑「黑白雙煞」蘭度夫及馬克加素分別貢獻22分及21分，以99:89擊敗勇士，總場數領先2:1，第4戰將繼續於灰熊主場上演。（now678台周二早上9:30直播）