旺角場上演「南東大戰」,賽事吸引近1,500人入場,座上客包括巴西名帥、上周四見完工「等通知」嘅米路,佢同南華足主張廣勇、東方高層齊齊睇波,賽後「油王」宣布同曾經喺南華取得成功嘅米路簽約一年。第3度執掌「少林寺」帥印嘅米路堅好腳頭,場波南華最後以3:0贏波,以第4名完成聯賽。

南華 3:0 東方

野人錫囝囝

米路好腳頭 梁志榮 姚學文再榮休

東方是役開賽以「全華班」出戰,南華亦派遣多名後備上陣,14分鐘伊達為南華先開紀錄,4分鐘後羅素頭槌破網領先2:0,完半場前伊達博得12碼,交由迪天奴操刀射成3:0。「野人」入波後走到場邊接過兒子遞上印有「100」號碼的波衫,象徵佢喺香港頂級賽事射入100球,然後佢十分識做將波衫拋上看台,送畀不斷為佢打氣嘅球迷,但就換嚟黃牌一張。

中場休息期間,東方為隊長梁志榮同姚學文舉行榮休儀式,已退居幕後嘅黃鎮宇同李思明亦參與其中,場面十分感人!下半場東方換入迪高同麥阿里士打,但未能取得入球,結果南華維持3:0勝局完場。值得一提係,南華謝家強末段兩黃一紅被逐,之後嘅亞協盃資格賽鬥東方將要停賽。

賽後,再度來港執教嘅米路話對香港球圈感到親切,喜見旺角場變得好靚,對於再成少林寺主帥嘅佢就話:「南華來季會捧盃補番數!」