快艇星級控衞基斯保羅（CP3）動靜皆宜，日前獲韋克福雷斯特大學頒發宗教學學位證書，場外威水，不過CP3於場內就認真「曳豬」！該位球星昨日以「陰招」暗算小牛球員巴利亞，結果被吹罰一級惡意犯規，快艇最終亦以99:129大敗30分，今鋪「CP3」都算奸有奸輸咯！

基斯保羅（左）唔止打波叻，原來讀書都掂。（法新社圖片）

據《洛杉磯時報》報道，獲家鄉韋克福雷斯特大學頒發宗教學學位證書的「CP3」，昨鬥小牛前表示：「我曾向自己承諾，就算要照顧囝囝，我都要攞到學位。」不過，基斯保羅的快艇隊友迪安迪佐敦就大潑冷水，聲稱「有錢嘅話根本唔需要學位」，明寸「CP3」多餘。

陰濕用手打巴利亞

可能被迪安迪佐敦「激親」，加上快艇昨鬥小牛陷入苦戰，基斯保羅昨仗只得11分進帳之餘，更一反常態出陰招，於第4節防守小牛控衞巴利亞上籃時，陰濕地從後以手肘撞擊巴利亞面部，導致雙方險爆衝突。球證及後翻睇慢鏡判罰「CP3」一級惡意犯規，結果快艇亦以30分大敗給小牛。

格芬Whatsapp攻勢求復出

縱然快艇今次輸大鑊，幸好球隊亦收到好消息，陣中「入樽王」格芬已克服手肘傷患，前晚已開始向教練李華士發動Whatsapp攻勢，游說教頭批准他復出，預計格芬可於周一凌晨重返戰場，為快艇披甲硬撼來訪的火箭，力爭即時反彈。

（開賽時間：周一凌晨3:30）

至於季前斷腳的溜馬球星保羅佐治，則向《印第安納星報》透露想延遲復出，「PG23」稱：「現時溜馬走勢強勁，我唔想打斷隊友間嘅化學作用，最理想係喺季後賽復出，我亦願意先做後備。」